Dhacdooyinkii iyo Murti-taariikheedkii Halganka Siyaasadeed ee Somaliland.

Qalinkii & fikraddii: Maxamed Sh-Ibraahim Xujaale &
Tafaf-tirkii & qaabayntii: Dhuux Digaale Ducaale.

Wuxuu yidhi tifaftiraha buuggu:
Buuggan waxa ku duugan xog iyo dhacdooyin aad u fara badan, oo uu qoruhu qodax iyo qaniinba uga guray caddayntooda, oo haba yaraate’e wax keli ah oo la-dafiri karo, ama la-beenayn karaa aanay ku jirin. Wuxuuna buuggani aniga iigu muuqday, inuu hor-seed ama fure u yahay, xaalad cusub, iyo laydh caafimaad oo soo beegan. Bulshooyinka Soomaaliyeed, meel kasta ha kala-joogaane, akhriste kasta faa’iido ayaa buuggan ugu jirta. Waayo; qofka aan wax badan ka ogeyn waxyaabihii dalka ka dhacay, ama loo sheeko-beenlayn jirey, waa xaqiiqadii uu kaga maarmi lahaa ku-tidhi-ku-teentii soo daashatey, ee lagaga habaabiyey daacadda iyo himilada xaqa ah. Kii xog-ogaalka ahaa, balse runta iska dadbi jireyna, buuggani waa dabarkii xidhayey, ee beentiisa indhaha ka tuurayey iwm.