Waxa uu buuggani la magac baxay Hal Ka Haleel, waxanu ku saabsan yahay Sooyaal-nololeedka iyo Suugaanta Hal-abuurka caanka ah ee Maxamed Ibraahim Warsame (Hadraawi). Buuggu waxa uu ka kooban yahay laba qaybood oo muhiim ah. Qaybta hore waxa ay ka hadlaysaa barbaaritaankii carruurnimo ee maansa-yahanka Maxamed Ibraahim Warsame (Hadraawi) iyo hanaqaadkiisii, dhalashadii iyo soo if-baxii hal-abuurkiisa suugaaneed, caan-baxa magaciisa abwaannimo iyo saamayntii maansadiisu ay bilowgiiba ku yeelatay dadka soomaalida, xadhiggii iyo noloshii xabsigii uu ku xidhnaan jirey ee Qansax dheere sannadihii 1973 - 1978. Waxa qaybtan lagula kulmayaa dheegag-suugaaneed ka mid ah maansooyinka Hadraawi, tusaale ahaanna loo adeegsanayo, la iskuna deyayo in wax lagaga tibaaxo curashadii maansooyinkaas iyo waxa ay ka hadlayaan ee ay abbaartoodu daarran tahay.