Buuggan la magacbaxay "Socdaalkii dheeraa" waa buug xanbaarsan dhacdooyin dhab ah. Sannadkii 1988-kii ayuu dagaal ka bilaabmay magaalooyinka Hargeysa iyo Burco. Dagaalkaasi wuxuu si naxariis darro ah u dhex maray ciidamadii SNM iyo ciidankii daacadda u ahaa Maxamed Siyaad Barre oo ilaa 1969-kii ka talinayey Jamhuuriyaddaii xilligaa la odhan jiray "Jamhuuriyadda Dimoqradiga Somaliya".

Hadaba buuggani wuxuu salka ku ahayaa dhacdooyinkaas soo maray dadkii deggenaa deegaanadii dagaaladu saameeyeen. Guuleed oo ahaa xilligaa nin dhallinyaro ah oo dhammaystay dugsigii sare, deggnaana magaalada xeebta ku taalla ee Berbera, wuxuu lasoo kulmay dhibaato farabadan. Guuleed iyo saaxiibadii waxay ka soo baxsadeen markii ay u adkaysan kari waayeen dhibaatadii iyo caga-juglayntii ay ku hayeen ciidankii loo yaqaanay "Faqashta" oo daacad u ahaa keligii taliye Maxamed Siyaad Barre. Socdaalkaasi wuxuu ku qaatay Guuleed muddo ku dhow saddex sannadood.

Qaabka xidhiidhka sheekada waxa allifay qoraaga. Waase sheeko salka ku haysa dhacdooyin run ah. Buuggani wuxuu ku xasuusinayaa qaabkii nololeed ee magaalada Berbera loo noolaa markii dagaalku ka bilaabmay magaalada Burco 27-05-88. waxaad kaloo ka dheehan kartaa deegaankii uu soo maray Guuleed iyo noloshii taallay. Qaxootigii Dulcad oo uu Guuleed muddo degganaa ayaad sawir guud ka helaysaa. Dagaaladii foodda lays daray iyo sida dhegta dhiigga laysu daray ayaad ka halacsanaysaa buuggan.

Buuggan waxa qoray Sayid Maxamed Yusuf "Dhegey. Waa qoraagii qoray buuggii lamagacbaxay: Somaliland: xorriyaddii lixdankii iyo xilligii ka horreeyey.